ՀՀ մի շարք ավագ դպրոցների ֆիզիկայի ուսուցիչներ նոր հմտություններ և գիտելիքներ ձեռք բերեցին «Ժամանակակից ֆիզիկա. հանրամատչելիացման և ուսուցման հիմնախնդիրներ ու լուծումներ» գիտաժողովի ընթացքում։ Գիտաժողովի աշխատանքներն ընթացան հունիսի 18-21-ը ՀՀ Գիտությունների ազգային ակադեմիայում, Արտեմ Ալիխանյանի անվան ազգային գիտական լաբորատորիայում, ՀՀ ԳԱԱ ֆիզիկական հետազոտությունների ինստիտուտում, Հայկական ատոմային էլեկտրակայանում, ՀՀ ԳԱԱ ֆիզիկայի կիրառական պրոբլեմների ինստիտուտում։
![](https://www.sci.am/images/2021/240628_162027_b_20240628_body.jpg)
Հայաստանի և արտերկրի գիտական և կրթական հաստատությունների գիտնականները հանդես եկան զեկուցումներով՝ նվիրված ֆիզիկայի զարգացման ժամանակակից միտումներին, ժամանակակից աստղաֆիզիկային, քվանտային ֆիզիկային, ակուստաֆիզիկային, ատոմային և միջուկային ֆիզիկային։ Ուսուցիչները ստացան վկայագրեր։
![](https://www.sci.am/images/2021/240628_162047_b_20240628_body3.jpg)
Գիտաժողովի աշխատանքները հանրագումարող նիստում ընդունվեց ՀՀ ԳԱԱ նախագահությանը հասցեագրված առաջարկությունների փաթեթ։
Գիտաժողովն անցկացվեց «Գիտությունը՝ հանրակրթությանը» ծրագրի շրջանակում։ Նպատակն էր խթանել Հայաստանում գիտության և կրթության կապի ամրապնդումը։
![](https://www.sci.am/images/2021/240628_162040_b_20240628_body2.jpg)
Գիտաժողովը կազմակերպել էին ՀՀ Գիտությունների ազգային ակադեմիան, ՀՀ ԳԱԱ ֆիզիկական հետազոտությունների ինստիտուտը, ՀՀ ԳԱԱ ֆիզիկայի կիրառական պրոբլեմների ինստիտուտը։
![](https://www.sci.am/images/2021/240628_162034_b_20240628_body1.jpg)
«Գիտությունը՝ հանրակրթությանը» ծրագրին աջակցում են Արտեմ Ալիխանյանի անվան ազգային գիտական լաբորատորիան և «Հայկական ատոմային էլեկտրակայան» ՓԲԸ-ն։
ՀՀ ԳԱԱ գիտության հանրայնացման և հասարակայնության հետ կապերի բաժին
28․06․2024թ․