Սույն թվականի ապրիլի 19-ին ՀՀ Գիտությունների ազգային ակադեմիայի Մաթեմատիկայի ինստիտուտում մեկնարկեց «Օպերատորների տեսություն և հարմոնիկ անալիզ» թեմայով «OTHA-Spring-2023» միջազգային գիտաժողովը։ Այն նվիրված է ՀՀ ԳԱԱ ստեղծման 80-ամյակին։
Գիտաժողովին մասնակցում են առաջատար մաթեմատիկոսներ ԱՄՆ-ից, Գերմանիայից, Իտալիայից, Իսպանիայից, Ռուսաստանից, ԱՄԷ-ից, Մեքսիկայից, Իսրայելից, Պորտուգալիայից, Ղազախստանից, Հայաստանից։
![](https://www.sci.am/images/2021/230420_133839_b_20230420_6.jpg)
ՀՀ ԳԱԱ Մաթեմատիկայի ինստիտուտի տնօրեն Ռաֆիկ Արամյանը նշեց, որ գիտաժողովն ավանդաբար անցկացվում է Դոնի Ռոստովում (ՌԴ)։ Այս տարի այն որոշվեց անցկացնել Հայաստանում՝ խորացնելու համագործակցությունը մաթեմատիկայի բնագավառում:
![](https://www.sci.am/images/2021/230420_133633_b_20230420_5.jpg)
«Սա շատ լավ հնարավորություն է ամրապնդելու մեր կապերն արտասահմանյան գիտական կենտրոնների հետ և ստեղծելու նոր համագործակցություններ։ Սա հատկապես կարևոր է երիտասարդ մաթեմատիկոսների համար, ովքեր այս միջոցառման շնորհիվ ծանոթանում են առաջատար մաթեմատիկական կենտրոններում կատարվող հետազոտություններին», - ասաց ՀՀ ԳԱԱ Մաթեմատիկայի ինստիտուտի տնօրեն Ռաֆիկ Արամյանը։
![](https://www.sci.am/images/2021/230420_133618_b_20230420_3.jpg)
«Այսօր մեր համար մեկ խնդիրը երիտասարդ կադրերի պատրաստումն է, և ես հույս ունեմ, որ նման հեղինակավոր միջոցառումների արդյունքում Հայաստանում գիտական ոլորտն ավելի գրավիչ կդառնա երիտասարդների համար», - նշեց ՀՀ նախագահի խորհրդական Վահրամ Դումանյանը։
![](https://www.sci.am/images/2021/230420_133626_b_20230420_4.jpg)
Հարավային դաշնային համալսարանի տարածաշրջանային գիտակրթական մաթեմատիկական կենտրոնի տնօրեն, «Journal of Mathematical Sciences» (Series A) գիտական ամսագրի գլխավոր խմբագիր, պրոֆեսոր Ալեքսեյ Կարապետյանցը շեշտեց համագործակցության զարգացման կարևորությունը։ Նա նշեց, որ նախատեսվում է գիտաժողովի արդյունքներին նվիրված հրապարակում «Journal of Mathematical Sciences» ամսագրում, որը բացի անգլերենից կլինի նաև հայերեն լեզվով։
![](https://www.sci.am/images/2021/230420_133612_b_20230420_2.jpg)
Գիտաժողովի շրջանակներում միջազգային հրատարակչական «Springer» ընկերությունը կազմակերպել է մասնագիտական գրքերի ցուցադրություն։ Գիտաժողովի աշխատանքները կշարունակվեն ապրիլի 20-ին՝ ՀՀ ԳԱԱ Մաթեմատիկայի ինստիտուտում։
![](https://www.sci.am/images/2021/230420_133604_b_20230420_1.jpg)
Գիտաժողովի կազմակերպիչներն են ՀՀ ԳԱԱ Մաթեմատիկայի ինստիտուտը և ՌԴ Հարավային դաշնային համալսարանը։
ՀՀ ԳԱԱ գիտության հանրայնացման և հասարակայնության հետ կապերի բաժին
19․04․2023թ․