Սույն թվականի դեկտեմբերի 29-ին ՀՀ Գիտությունների ազգային ակադեմիայի Արևելագիտության ինստիտուտում տեղի ունեցավ 2022 թվականին հրատարակված մենագրությունների, գրքերի, ժողովածուների շնորհանդեսը։
![](https://www.sci.am/images/2021/221230_140216_b_20221230_body1.jpg)
«Յուրաքանչյուր աշխատության հետևում կանգնած է ամիսների, տարիների աշխատանք, որի շնորհիվ մեր ինստիտուտի արդյունքներն այս տարի էլ ավելի հարստացան։ Մենք անցում ենք կատարում միջազգային չափորոշիչների և 2023 թվականին նպատակ ունենք տեղ գտնել միջազգային գիտական շտեմարաններում», - իր խոսքում ասաց ՀՀ ԳԱԱ Արևելագիտության ինստիտուտի տնօրեն Ռոբերտ Ղազարյանը։
![](https://www.sci.am/images/2021/221230_135835_b_20221230_body2.jpg)
ՀՀ ԳԱԱ Հայագիտության և հասարակական գիտությունների բաժանմունքի ակադեմիկոս-քարտուղար, ակադեմիկոս Յուրի Սուվարյանը նշեց․ «Այս տարի Արևելագիտության ինստիտուտի արդյունքները տպավորիչ են։ Հայ-արևելագիտական միտքը պետք է դուրս գա միջազգային ասպարեզ։ Հարկ է, որ շատ լինեն օտարալեզու գիտական հրապարակումները։ Ավարտվող տարվա ինստիտուտի մյուս նվաճումն այն է, որ լուրջ քայլեր են կատարվել գիտական հանդեսները ներառելու «Սկոպուս» գիտատեղեկատվական և այլ միջազգային շտեմարաններում։ Այս ուղղությամբ ձեր այս քայլերը շոշափելի են ու հեռանկարային»։
![](https://www.sci.am/images/2021/221230_140001_b_20221230_body.jpg)
2022 թվականին ՀՀ ԳԱԱ Արևելագիտության ինստիտուտը լույս է ընծայել 17 աշխատություն։
![](https://www.sci.am/images/2021/221230_140029_b_20221230_body3.jpg)
Ելույթ ունեցողները շնորհավորեցին ներկաների գալիք Նոր տարին և Սուրբ ծնունդը՝ մաղթելով առողջություն, ստեղծագործական նվաճումներ և երջանկություն։
ՀՀ ԳԱԱ գիտության հանրայնացման և հասարակայնության հետ կապերի բաժին
29.12.2022թ.